Цените на нафтата денеска повторно надминаа 97 долари за барел, поттикнати од сомнежите на инвеститорите за одржливоста на примирјето меѓу Соединетите Американски Држави и Иран. Ситуацијата е дополнително комплицирана од фактот дека Ормускиот теснец останува претежно затворен, што ја зголемува неизвесноста на пазарите, пишува Euronews.
Цените се опоравија откако паднаа претходно во текот на неделата по објавувањето на двонеделното примирје меѓу Вашингтон и Техеран. Барелот нафта од типот Брент, кој служи како меѓународна референтна вредност, се зголеми за 2,4 проценти на 97,02 долари. Американската референтна нафта се зголеми за 3,3 проценти, достигнувајќи 97,50 долари за барел.
Ова е ненадеен пресврт со оглед на тоа што цените на двата вида нафта накратко паднаа под 92 долари во вторник, по објавувањето на примирјето. Ова закрепнување на цените го одразува продлабочениот скептицизам кон објавеното примирје. И покрај повторените повици од САД, Иран продолжува да го држи Ормускиот теснец, клучен воден пат низ кој минува околу една петтина од светската нафта, во голема мера затворен.
Неговата блокада е јасен сигнал дека примирјето е далеку од сигурно. Тензиите дополнително се засилија со израелските напади врз Либан, во кои стотици луѓе беа убиени и ранети, што предизвика сомнежи за вистинското смирување на поширокиот регионален конфликт.
На азиските пазари преовладуваше песимистичко расположение. Токискиот Nikkei 225 падна за 0,9 проценти, додека јужнокорејскиот Kospi забележа пад од 1,6 проценти. Хонгконшкиот Hang Seng ослабе за 0,4 проценти, а шангајскиот композит за 0,7 проценти. Австралискиот S&P/ASX 200 и тајванскиот Taiex паднаа за по 0,1 процент. Американските фјучерси исто така беа малку во минус.
Ова е во остра спротивност со средата на Волстрит, каде што пазарите скокнаа по веста за примирјето. Индексот S&P 500 скокна за 2,5 проценти, индустрискиот просек Dow Jones за 2,9 проценти, а Nasdaq Composite за 2,8 проценти.
Растот го водеа акциите на туристичките компании – акциите на „Јунајтед ерлајнс“ пораснаа за 7,9 проценти, „Американ ерлајнс“ за 5,6 проценти, а операторот на крстарења „Карнивал“ за 11,2 проценти, делумно компензирајќи ги загубите предизвикани од зголемувањето на цените на горивата од почетокот на конфликтот со Иран.
Преговорите насочени кон постигнување траен крај на конфликтот би можеле да започнат уште во петок во Пакистан. Се очекува американскиот преговарачки тим да го предводи потпретседателот на САД, Џ. Д. Венс. Сепак, останува отворено прашање дали примирјето воопшто ќе се одржи додека не започнат преговорите, со оглед на тоа што Ормутскиот теснец останува блокиран, а израелските напади продолжуваат.
На другите пазари, цената на златото падна за 0,7 проценти на 4.743,20 долари за унца, а на среброто за 1,6 проценти на 74,18 долари за унца. Падот на цените на благородните метали се должи на намалениот интерес за безбедни засолништа поради оптимизмот за прекинот на огнот, иако тој оптимизам се покажува сè покревок. Доларот малку зајакна во однос на јенот, од 158,57 на 158,66 јени, додека еврото малку се искачи на 1,1668 долари.