Цената на суровата нафта од типот Брент се зголеми за 64 проценти во март, што е најголем месечен скок од Заливската војна во 1990 година, објави Би-Би-Си. Брент е глобален репер за нафта и е договор за купување барел нафта еден месец однапред. Зголемувањето на таа цена обично се прелева врз цените на горивата бидејќи нафтата е клучна суровина во нивното производство.
Цената на Брент за испорака во јуни беше околу 105,36 долари (околу 97 евра), што е зголемување од 1,2 проценти. Претходното најголемо месечно зголемување беше во 1990 година за време на ирачката инвазија на Кувајт, што ги наруши глобалните снабдувања со енергија и предизвика стравувања од поширок конфликт на Блискиот Исток, изјави Алберто Белорин од „ИнтерКапитал Енерџи“, објави Би-Би-Си.
Слични услови се присутни и денес поради војната со Иран, што го зголемува геополитичкиот ризик и ги зголемува цените на нафтата. Доколку прекините во транспортот продолжат и конфликтот не стивне, цените на нафтата би можеле дополнително да пораснат, предупреди Го Џинг Ронг од Сингапурскиот универзитет за менаџмент.
Во меѓувреме, азиските берзи нагло пораснаа утрово откако американскиот претседател Доналд Трамп изјави дека САД би можеле да се повлечат од Иран во рок од две до три недели. Јапонскиот индекс Nikkei 225 порасна за 4 проценти, додека јужнокорејскиот Kospi скокна за повеќе од 6 проценти.
Војната меѓу САД, Израел и Иран започна кон крајот на февруари кога американските и израелските сили започнаа напади врз иранските воени и нуклеарни цели, вклучувајќи ги базите и објектите на Револуционерната гарда поврзани со ракетната програма на Иран.
Иран возврати со ракетни и беспилотни летала напади врз американските бази во регионот и врз цели во Израел и земјите од Персискиот Залив, додека конфликтите се проширија и на поморскиот сообраќај, особено во Ормутскиот теснец, низ кој минува голем дел од светската нафта.
Тензиите продолжуваат да растат и покрај повремените сигнали за можни преговори, ниту една страна сè уште не покажува подготвеност брзо да го заврши конфликтот.