Венецуелскиот претседател Николас Мадуро го повика американскиот претседател Доналд Трамп да покаже воздржаност во врска со масовното американско воено присуство на Карибите, пренесува ДПА.
„Ајде да направиме мир“, одговори лидерот на англиски јазик на митинг во Каракас кога новинар на Си-Ен-Ен го праша дали има порака за Трамп.
Тој ги повика граѓаните на Соединетите Американски Држави да се залагаат за мир.
„Крај на бескрајните војни“, рече Мадуро.
Пентагон во меѓувреме објави фотографии од носачот на авиони „УСС Џералд Р. Форд“ во западниот Атлантик. Во еден од нив, најголемиот воен брод во светот е придружуван од три други воени бродови, со бомбардер со долг дострел и неколку борбени авиони што летаат над него.
Во четврток, шефот на Пентагон, Пит Хегсет, го објави почетокот на операцијата „Јужно копје“ за борба против трговијата со дрога во регионот.
Во последните недели, американските сили во регионот потопија околу 20 бродови осомничени за шверц на дрога, при што загинаа околу 80 луѓе.