Кога Доналд Трамп синоќа на прес-конференција жестоко застана во одбрана на својот министер за одбрана Пит Хегсет, причината беше сосема јасна: Трамп всушност се брани себеси, се наведува во анализата на Си-Ен-Ен.
Отпуштањето на поранешниот водител на „Фокс њуз“ во време кога е покрената постапка за негов импичмент би значело директно признание дека војната со Иран, чиј најгласен поддржувач беше Хегсет, претставувала огромна грешка. Со тоа би пропаднал обидот на Трамп воениот дебакл да го претстави како историска победа.
Massie: "I hope Hegseth addresses the 8 articles of impeachment, and doesn‘t get up and misquote the Bible in Quentin Tarantino fashion and do some pull-ups and call everybody fat and gay. I may have just given you half his speech, I don’t know." https://t.co/W5EumfVJ5J
— Aaron Rupar (@atrupar) November 9, 2026
За време на уште еден необичен јавен настап, на кој најпрво му понуди работа како портпарол на Белата куќа на шефот на УФЦ, Дејна Вајт, а потоа рече дека се шегува, Трамп жестоко го бранеше шефот на Пентагон.
„Што всушност направи Хегсет? Ја доби војната“, тврдеше Трамп, фалејќи се со операцијата за извлекување на Николас Мадуро од Венецуела, која траела 48 минути, и уверувајќи ги новинарите дека Хегсет „ја добива војната во Иран“, и покрај тоа што воените стратези го оценуваат конфликтот како нерешлива катастрофа.
Освен самата војна, причината поради која Трамп толку цврсто се држи до Хегсет е тоа што министерот најверно го отсликува самиот претседател, наведува Си-Ен-Ен.
Хегсет ги отстрани новинарите од Пентагон, поведе отворена кампања против генералите и таканаречената „воук“ идеологија, а зградата неофицијално ја преименуваше во „Министерство за војна“. Доколку Трамп сега се откаже од таков човек, практично би се откажал од сопствениот политички бренд.
Но, притисокот во Конгресот дојде од неочекувана страна. Барањето за импичмент во осум точки не го покрена демократ, туку конзервативниот републиканец Томас Маси, кој го обвини Хегсет за водење противуставна војна, игнорирање на цивилните жртви и вонсудски егзекуции на наводни бродови за шверц на дрога.
„Не го обвинуваме затоа што е неспособен. Напротив, беше многу ефикасен во убивањето училишни деца во Иран и во вонсудските ликвидации“, изјави Маси пред камерите.
Трамп веднаш жестоко реагираше на обвинувањата на Маси, нарекувајќи го сопартиецот „болен човек и целосен губитник“. Но, Маси не му остана должен.
Коментирајќи ја најавената одбрана на Хегсет, Маси јавно му се потсмеваше на шефот на Пентагон:
„Само се надевам дека нема да излезе пред новинарите, да цитира Библија во стилот на Квентин Тарантино, да прави згибови и да ги нарекува сите што се за импичмент дебели и педери“.
Времето во кое се случува нападот врз шефот на Пентагон е исклучително неповолно за Белата куќа. По тешкиот пораз на меѓуизборите, во Претставничкиот дом има десетици републиканци кои ги загубија своите места и токму војната на Трамп и поскапувањето на горивата ги обвинуваат за изборниот неуспех.
Овие огорчени конгресмени сега во постапката за импичмент гледаат идеална можност за одмазда, додека демократите од страна со задоволство го следат судирот во владејачката партија.
Си-Ен-Ен забележува дека и Трамп и Хегсет се затвориле во сопствената реалност, убедувајќи ја јавноста дека победуваат над Иран, додека војната секојдневно троши милијарди долари, цените на горивата нагло растат, а сојузниците во Заливот се оддалечуваат од Вашингтон.
Продолжувањето со тврдењата дека војната, која гласачите ја презираат, всушност е триумф, станува политичко самоубиство од кое Трамп не може да избега сè додека на чело на Пентагон има министер кој ја персонифицира таа воена авантура.
Поради сето ова, позицијата на Хегсет на долг рок е неодржлива. Маси за Си-Ен-Ен отворено оцени дека министерот за одбрана веројатно нема да ја дочека Новата година на функцијата, потсетувајќи на старото правило во Белата куќа:
„Трамп стои зад своите луѓе точно до моментот кога ќе одлучи дека повеќе нема да стои“.
Најголемата опасност за Хегсет, според тоа, не е самиот импичмент, туку моментот кога Трамп ќе процени дека најлесно ќе се спаси себеси ако едноставно го жртвува својот омилен министер.