Британскиот државјанин Хауард Филипс (65) денес е осуден на седум години затвор за обид за шпионажа за Русија, објави лондонскиот суд.
Филипс беше прогласен за виновен во јули за обид да пренесе информации за поранешниот британски министер за одбрана Грант Шапс на двајца мажи за кои верувал дека се руски разузнавачки агенти, но всушност биле британски тајни агенти, објави АП.
„Бевте подготвени да ја предадете вашата земја за пари“, рече судијката Боби Чима-Граб за време на изрекувањето на пресудата во Крунскиот суд во Винчестер.
Таа додаде дека Филипс „има нарцисоидни особини на личноста и претерано чувство на самоважност“.
За време на судењето, беше наведено дека обвинетиот имал намера да им помогне на руските агенти од крајот на 2023 година до мај 2024 година.
Според судот, Филипс се обидел да ги предаде личните контакти на Шапс и локацијата на неговиот приватен авион за да им овозможи на Русите да ги прислушуваат британските одбранбени планови.
Неговата поранешна сопруга изјави дека Филипс „сонувал да биде како Џејмс Бонд“ и опсесивно гледал филмови на британската тајна служба бидејќи бил „заљубен во идејата“.
Во изјава до судот, Шапс изјавил дека бил шокиран кога дознал за активностите на Филипс и се присетил дека вечерал во неговиот дом во 2002 година.
„Неприфатливо е неодговорното однесување на некого да го изложува моето семејство на сериозни ризици што ги претставуваат активностите на странска разузнавачка служба“, рече поранешниот министер.