Бароницата Елиза Менингем-Булер, поранешната шефица на британската разузнавачка агенција МИ5, службата што се занимава со внатрешна безбедност, денес изјави дека оние кои мислат дека Велика Британија веќе е во војна со Русија „можеби се во право“.
Таа се осврна на изјавата на советничката за одбрана на британската влада, д-р Фиона Хил, која во јуни предупреди дека „труења, атентати, саботажни операции, разни сајбер напади и операции на влијание, можно е да се заклучи дека Русија е во војна со Велика Британија“, објавува Скај њуз.
Бароницата Менингем-Булер, генерална директорка на МИ5 од 2002 до 2007 година, се присети на средбата со Владимир Путин по самитот на Г8 во 2005 година.
„Сите се надевавме дека минатото на Русија нема да преовлада. Но, грешевме во тоа“, рече Менингем-Булер.
Зборувајќи на официјалниот подкаст на Домот на лордовите, бароницата Менингем-Булер рече дека д-р Хил веројатно знае повеќе за Путин од кој било друг.
„Од инвазијата на Украина и разните работи што ги прочитав дека Русите ги прават тука – саботажи, собирање разузнавачки информации, напади врз луѓе и така натаму – Фиона Хил можеби е во право кога вели дека веќе сме во војна со Русија. Тоа е поинаков вид војна, но непријателството, сајбер нападите, физичките напади, разузнавачката работа, се многу обемни“, рече бароницата Менингем-Булер, поранешна шефица на британската разузнавачка агенција МИ5.