Полскиот премиер Доналд Туск се обрати до медиумите пред вонредниот состанок на кабинетот, на кој ќе учествуваат и полските генерали.
Во јавното обраќање, Туск рече дека е задоволен од одговорот на Полска на моменталната вонредна состојба.
„Процедурите функционираа, процесот на донесување одлуки беше беспрекорен, а заканата беше елиминирана благодарение на решителната акција на командантите, војниците, пилотите, па дури и сојузниците. Ова најверојатно е провокација од големи размери. Ние сме во консултација со нашите сојузници“, рече Туск.
Тој, исто така, истакна дека ова е прв пат руски беспилотни летала да бидат соборени на територијата на НАТО.
– Сите наши сојузници ја сфаќаат ситуацијата многу сериозно. Не сме регистрирале жртви. Потрагата по остатоците од соборените беспилотни летала е во тек. Полека ги отвораме повторно аеродромите. Нивното затворање не беше предизвикано од заканата од напад врз аеродромите. Ова беше неопходно поради ситуацијата и оперативните потреби на нашите пилоти, објасни тој.
Премиерот, исто така, објави дека е во контакт со војската и претседателот Карол Навроцки.
Го проценуваме влијанието на настаните и идните потреби. Оваа ситуација ја покажува важноста не само на инвестициите, туку и на целосната координација на дејствијата и едноставните процедури, така што во случај на закана можеме да дејствуваме на соодветен и решителен начин, заклучи Туск.