Милиони Украинци кои се вратија во своите домови би можеле повторно да бидат принудени да заминат во текот на зимата, бидејќи Русија продолжува со нападите врз цивилната инфраструктура, соопшти Меѓународната организација за миграција (ИОМ), позната и како Агенција за миграција на ОН.
Според извештајот објавен на 16 октомври, околу 1,56 милиони Украинци, кои се вратиле во земјата до јуни 2026 година, сега живеат во области близу до линијата на фронтот.
Во овие области, три од секои четири лица имаат потреба од материјали за поправка на оштетените ѕидови, додека две од секои четири лица имаат потреба од изолација и материјали за поправка на покривите.
Вкупно 4,1 милион луѓе се вратиле во Украина откако претходно ги напуштиле своите домови – бројка во која не се вклучени внатрешно раселените лица – се наведува во извештајот.
„За милиони Украинци, предизвикот веќе не е само дали можат да се вратат дома, туку дали можат таму да останат безбедни. Сегашните услови го отежнуваат тоа“, изјави Артур Еркен, регионален директор на ИОМ за Европа и Централна Азија.
За ситуацијата зборуваше и Дејан Кесеровиќ, заменик-шеф на мисијата на Меѓународната организација за миграција (ИОМ) во Украина.
„Зимата брзо се приближува во Украина, а за многу Украинци, претстојните месеци би можеле да бидат најтешките од почетокот на војната од целосен обем“, изјави тој.
Дури и таму каде што има греење, многу семејства не можат да си дозволат соодветно да ги загреат своите домови. Само 32 отсто од Украинците изјавиле дека можеле доволно да ги загреат своите куќи и станови во текот на претходната грејна сезона.
Во областите близу до линијата на фронтот, таа бројка паднала на само еден отсто. Според податоците на Агенцијата за миграција на ОН, шест од десет домаќинства ја намалиле потрошувачката на енергија за греење. Од почетокот на војната во 2022 година, речиси 3,6 милиони луѓе остануваат внатрешно раселени низ Украина.
Украинците кои се вратија во своите домови во последните три месеци често изјавуваат дека имаат намера повторно да заминат, што укажува на зголемена загриженост поради влошувањето на условите за живот, соопшти Меѓународната организација за миграции (ИОМ).
Европските земји, вклучително и Полска, Германија и Чешка, моментално прифаќаат околу шест милиони украински бегалци.
Кесеровиќ изјави дека очекува земјите домаќини да се подготват за пристигнување на уште Украинци, доколку ситуацијата дополнително се влоши.
Според ИОМ, руските напади врз енергетската и другата критична инфраструктура вршат сè поголем притисок врз системите за снабдување со електрична енергија, греење и вода во Украина, додека нападите со беспилотни летала и ракети низ целата земја продолжуваат да одземаат цивилни животи.
Организацијата предупреди дека сигурното снабдување со вода станува голем проблем, бидејќи водоводните системи во голема мера зависат од електричната енергија.
Агенцијата на ОН инсталираше 31 соларна централа за поддршка на водоводните системи низ Украина, но нагласи дека потребите се сè уште огромни.
ИОМ исто така предупреди дека недостигот на финансиски средства може да ја загрози испораката на помош. Досега се обезбедени помалку од седум отсто од средствата потребни за планот за одговор на кризата во Украина за 2026 година.
Организацијата нагласи дека постои итна потреба од дополнителни средства за подобрување на топлинската изолација на домовите, со оглед на тоа што домаќинствата се соочуваат со температури под нулата. Во текот на ноќта меѓу 13 и 14 октомври, Русија изврши голем ракетен напад врз Киев, при што беше погодена станбена зона, а цел беа и неколку енергетски објекти во градот.
Украинскиот премиер Серхиј Корецки изјави дека биле нападнати сите три градски термоелектрани – кои произведуваат и електрична енергија и топлинска енергија – како и клучна инфраструктура во регионот на Киев, која го снабдува главниот град и централните делови на земјата со енергија.