Во врска со мировните преговори меѓу Русија и Украина се огласи и актуелниот претседател на САД, Доналд Трамп.
„Време е само да го завршиме тоа. Ќе го завршиме“, рече Трамп.
Тој додаде дека сака да одржи средба со рускиот претседател Владимир Путин што е можно поскоро – штом тие можат да го договорат тоа.
„Путин не сакаше да дојде бидејќи не бев таму“
Трамп денеска повтори дека не е изненаден што рускиот претседател Владимир Путин не дојде на средбата што Соединетите Американски Држави се обидоа да ја организираат во Турција меѓу украинската и руската делегација. „Путин не сакаше да дојде бидејќи јас не сум таму“, тврди Трамп, кој вчера изјави дека е малку веројатен значителен напредок во преговорите додека тој и Путин не се сретнат лично.
За потсетување, американскиот претседател е на последниот ден од посетата на Блискиот Исток, а денеска зборуваше на настан на Советот за деловна соработка во Обединетите Арапски Емирати.