Соединетите држави постигнаа голем напредок во преговорите со Украина и Русија во последните денови, изјави американскиот претседател Доналд Трамп. Говорејќи пред новинарите во Овалната соба на Белата куќа, Трамп го повтори својот оптимизам за завршување на војната, истакнувајќи дека неговиот тим постигнал значителен напредок во последните денови.
„Ќе ви кажам дека постигнавме голем напредок со Украина и голем напредок со Русија во последните неколку дена и би било одлично да се стави крај на оваа војна“, рече Трамп.
Тој додаде дека брзиот крај на војната ќе значи „не мораме повеќе да зборуваме на тој начин, за нуклеарно оружје“, мислејќи на неодамнешната изјава на францускиот претседател Емануел Макрон за можноста за проширување на нуклеарната заштита на европските сојузници. „Би било одлично сите да се ослободат од нуклеарното оружје“, заклучи Трамп.
