Поранешниот портпарол на некогашниот украински премиер Микола Азаров, Сергеј Заворотниј, е ранет во експлозија на автомобил во Москва, објавија руските медиуми.
„Комерсант“ објави дека Заворотниј, кој беше близок соработник на Азаров, проруск премиер на Украина од 2010 до 2014 година, бил хоспитализиран по експлозијата во московската населба Чертаново.
️🫡 В Москві знову підірвали автомобіль: він належить прессекретарю експрем’єра України Миколи Азарова Сергію Заворотному, – росЗМІ
🔊Toyota Fortuner проїхала близько 200 метрів після виїзду з двору. Заворотного госпіталізували https://t.co/g44eV9KoTJ
— Oleksii (@Oleksii88877) November 13, 2026
Ова е втор ваков бомбашки напад во Русија во последните два дена, пишува „Ројтерс“. Москва за претходните атентати врз високи воени функционери и лица вклучени во руските воени активности ја обвинува Украина.
Телевизијата РЕН ТВ и Телеграм-каналот 112 објавија дека Заворотниј во нападот ја загубил левата рака. Тој бил пренесен во болница со потрес на мозокот, скршеници на ребрата и други повреди.
Поранешниот шеф на Заворотниј, Микола Азаров, избега во Русија во 2014 година, откако револуцијата на Мајдан го собори прорускиот претседател Виктор Јанукович. До тоа дојде откако Јанукович го прекрши ветувањето за поблиски односи со Европската Унија, пренесува „Ројтерс“.
Азаров во петокот за руската државна новинска агенција ТАСС изјави дека нема информации за експлозијата на автомобилот, освен дека Заворотниј ја преживеал.
Ден претходно, во Санкт Петербург беше убиен функционер на руската војска. Украински извори во некои случаи преземаат одговорност за ваквите напади, додека во други ја негираат вмешаноста. Киев не го коментираше нападот во четвртокот.