Однесувањето кон Бугарите во Македонија е политика спонзорирана од државата, смета главниот уредник на новинската агенција БГНЕС, Георги Пашкулев.
Во интервју за „Бугарија во етер“ рече дека пропагандата на Скопје била на најниско ниво во времето на Зоран Заев.
„Мора да бидеме свесни дека антибугарската пропаганда во Македонија никогаш не престана и секогаш кога можеше да ескалира, македонските власти ја користеа. Во некои моменти беше на пониско ниво, како што беше во времето на Зоран Заев кога се создаваа услови за подобрување на односите. И секогаш кога можело да биде ескалирано, македонските власти тоа го користеа затоа што постоењето на самата Македонија како држава отсекогаш се градело на негирање на се што е бугарско”, изјави главниот уредник на БГНЕС, Георги Пашкулев.
Според него, изгледите не изгледаат добри, бидејќи самите власти на Македонија го поттикнуваат антибугарското однесување.
„Ова е политика спонзорирана од државата, ако престане оваа политика, овие луѓе нема од што да живеат. Тоа значи дека ќе ѝ свртат грб на сопствената историја на предците. Единствена шанса за промена е оваа земја да забрза кон ЕУ“, категоричен беше Пашкулев.
Новинарот смета дека бугарските интереси се релативно загарантирани со францускиот предлог, а Македонија може да се движи кон Европа само ако го промени Уставот.
„Македонија може да почне преговори само со промена на Уставот и тоа Европската комисија јасно го кажа. Ако не ја направат таа промена ќе назадуваат и ќе бидат корумпирани и изолирани. Ако не ја искористат шансата која ние им ја дадовме во 2017 година за да го отвориме преговарачкиот процес за Западниот балкан, нема да можат да се приклучат кон ЕУ“, додаде тој.