Актуелниот македонски фудбалски шампион „Шкендија“ ги засили своите редови за пролетниот дел од сезоната со досегашниот играч на штипска „Брегалница“, Михаил Маневски.
Прволигашот од Штип објави попладнево дека трансферот доаѓа на инсистирање на левокрилниот дефанзивец да ги засили редовите на шампионот од Тетово.
– Исклучиво по желба и голема иницијатива на играчот, ние се согласивме за трансфер во Шкендија на Михаил Маневски, кој беше еден од носителите на играта на „сините“ имајќи изминативе години целосна поддршка од сопственикот Кирил Гогов, се до стручниот штаб. Како клуб не сакавме да се ослободиме од неговите услуги, но пресудна беше желбата на фудбалерот да направи промена на средината. Секако, како клуб ги штитиме своите интереси и ФК Брегалница добива соодветна трансферна оштета за реализацијата на оваа преселба, изјави спортскиот директор на Брегалница, Никола Тонев за клубскиот сајт.