Вистински ураган ја погоди денеска Москва, по цела недела жештини со температури кои надминуваа 35 степени. Силниот ветер корнеше дрвја и покриви од згради, а повеќе метро станици во рускиот главен град се поплавени. Во прекин е градскиот превоз на повеќе локации поради паднати дрвја, а откако гром удри во трафостаница, повеќе од 15.000 московјани се без струја.
Снимките го покажуваат интензитетот на ветрот и дождот, а руските метеоролози велат дека невремето, кое го нарекоа „ураган“, е незапаметно во руската престолнина.
Според локалните медиуми, целосно поплавена е метро станицата Јасенево, а во Раменско ветрот соборил градежен кран. Засега нема информации за евентуални жртви и повредени, но причинета е огромна материјална штета.