Лидерот на Движењето Самоопределување, Аљбин Курти, нема да може да учествува на претстојните парламентарни избори во Косово, бидејќи Изборниот панел за жалби и претставки (ЕЦАП) во Приштина одлучи денеска кандидатите кои во последните три години биле осудени да немаат право на учество на овие избори.
ЕЦАП ја донесе одлуката врз основа на жалбите поднесени од сите партии, а според одлуката на Централната изборна комисија.
– И покрај уцените и притисоците кои пристигнаа од страните кои се жалат, ЕЦАП ја извршува својата работа целосно професионално согласно одлуката на Уставниот суд и важечките закони, истакна извор од ЕЦАП.
Политичарот пред две години беше осуден на условна казна поради фрлање солзавец во косовскиот парламент, а во септември 2018 година, пресудата ја потврди и Апелацискиот суд.
Покрај Курти, уште четворица кандидати од листата на движењето Самоопределување нема да можат да учествуваат на изборите.