Бразилскиот претседател Жаир Болсонаро не го поддржува глобалното брзање за купување и дистрибуција на вакцината против коронавирус.
„Брзањето не е оправдано“, рече Болсонаро во видео снимка што вчера беше објавена на социјалните мрежи од еден од неговите синови.
-Тоа е мешање во животот на луѓето, рече бразилскиот претседател.
Коментарот доаѓа откако бразилскиот лидер, кој од почетокот на пандемијата го минимизираше коронавирусот, пред три дена ги критикуваше производителите на вакцини „Фајзер“ и „БиоНТек“, со што се чини ги разгоре стравувањата на јавноста за потенцијалните несакани ефекти на вакцината.
-Договорот јасно наведува дека „Фајзер“ не е одговорен за штетните реакции. Доколку се претворите во кајман, тоа ќе биде ваш проблем, изјави тој. Кајман е полуводен влекач, сличен на алигатор.
Во оваа најголема земја во Латинска Америка, со население од 210 милиони лица, досега има повеќе од седум милиони заразени со коронавирус.