Премиерот на Непал, Кадга Шарма Оли, по повод Светскиот ден на тигарот, изјави дека неговата земја е на дофат на поставената цел – удвојување на бројот тигри на својата територија.
– Ние сме целосно посветени на оваа цел во светски рамки – удвојување на бројот на тигри до 2022 година, истакна Оли.
Светскиот фонд за диви животни (ВВФ) проценува дека доколку се одржи сегашната стапка на раст на непалските тигри, земјата би можела да стане првата од 13 држави каде што ќе се оствари ветувањето од Самитот за тигрите во Санкт Петербург, 2010 година.
Од друга страна пак, бројот подвидови на малезискиот тигар сѐ уште е под 200, што е причина за загриженост во Малезија. Според Фондот, денес околу 3.900 тигри живеат во дивината ширум светот, што е огромно намалување во однос на 100.000 од пред сто години, а Малезија е меѓу државите каде што тигрите се најзагрозени.
„Губењето на живеалиштата како резултат на брзиот развој и проширувањето на земјоделските површини, како и прекумерниот лов на тигрите, резултираше во драстично намалување на нивниот број“, се вели во соопштението.
ВВФ исто така предупредува на прекумерната сеча на делови од малезиската џунгла, што е еден од главните фактори во намалувањето на бројот на малезиските тигри.