Во овие непознати и нови услови што ги живееме сите на планетата, со пандемијата што ги става на тест подготвеноста и издржливоста на здравствениот систем, на општествено- економските структури на секоја земја, но и индивидуалната издржливост и одговорност на секој од нас кон општеството, Фондацијата „Ставрос Ниархос“ ги зајакнува напорите за справување со кризата, формирајќи Глобална иницијатива за помош во висина од 100.000.000 долари, соопштуваат од Фондацијата и додаваат дека „како што ширењето на Ковид-19 не познава граници, така и справувањето со вирусот е заеднички за целата планета“, јави дописничката на МИА од Атина.
Од Фондацијата велат дека активностите се насочени кон итно, но и долгорочно справување со пандемијата во целиот свет, во зајакнувањето на ефикасното справување со последиците врз општествено- економските структури, поддршката на ранливите групи во општеството, но и поддршка на напорите за изнаоѓање вакцина и медицински третман за коронавирусот.
-Една од нашите цели е да го помогнеме медицинското истражување. Затоа веќе дониравме 3.000.000 долари за одделот за истражување на Универзитетот Рокфелер, еден од најпознатите светски истражувачки центри, што започна надежен обид за откривање на вакцини и развој на третмани за Ковид -19. Станува збор за глобална епидемија, што има универзален, а не национален карактер, соопштуваат од Фондацијата
Претседателот на „Ставрос Ниархос“, Андреас Дракопулос вели дека тие сметаат дека е нивна обврска да сторат сé што можат за да придонесат во напорите за намалување на последиците од Ковид-19, но и да ги поддржат оние што се во првите редови.
Фондацијата формирана во чест на грчкиот бродосопственик Ставрос Ниархос е една од најголемите приватни добротворни организации во светот со активности во над 120 земји, со донации на невладини организации, донации во областа на уметноста и културата, образованието, здравството и спортот итн.
Од 1996 година, има донирано над 2,9 милијарди долари, преку повеќе од 4.600 донации за непрофитни организации, во 124 земји низ целиот свет.