Доктор од Кавадарци не ги почитувал правилата за самоизолација и одел на работа, иако неговата ќерка се вратила од Италија на 6 март, информираат од обвинителството. И покрај упатствата дадени директно од страна на специјалист-епидемиолог дека целото семејство треба да биде во домашна изолација од 14 дена поради патувањето на нивната ќерка, докторот во периодот од 10 март до 20 март продолжил да оди на работа. На 10 март тој заедно со неговата ќерка правеле анализи на Одделот за микробиологија и биле во амбулантата за уво, нос и грло во Кавадарци.
Јавен обвинител од Основното јавно обвинителство Кавадарци за случајот поднел Предлог за издавање казнен налог, за продолжено кривично дело – Непостапување според здравствените прописи за време на епидемија од член 206 став 1 во врска со член 45 од Кривичниот законик.
Обвинителството му предлага на судот на обвинетиот да му изрече парична казна во износ од 100 дневни глоби, при што висината на една дневна глоба да биде одредена во износ од по 45 евра во денарска противвредност.
