Во експлозија на бомба во најголемиот пакистански град Карачи, загинаа 45, а повредени се 149 лица, соопшти полицијата. Меѓу жртвите има деца и жени.
Агенцијата Ројтерс наведува дека за експлозијата се сомничи бомбаш-самоубиец и дека нападот е извршен врз шиитски муслимани додека ја напуштале џамијата во населеното место Абас Таун.
Според соопштението на шефот на локалната полиција Фајаз Лугари, експлозијата сериозно оштетила две станбени згради, а после неа следувала друга, за која не може да се каже дека е бомба.
Локалните жители не чекајќи ги спасувачите самите почнале да ги извлекуваат луѓето од под урнатините и да ги пренесуваат до болница, а многу од повредените се во сериозна состојба.
Одговорност за сега не презеде ниту една група.
Во етничкото, секташко и политички мотивираното насилство, во Карачи минатата година загинаа 2284 луѓе и тоа е најлош биланс на жртви во овој град во последните 20 години, според независната пакистанска Комисија за човекови права.