Одлика на медиумското претставување во вториот круг беше настојувањето да се обезбеди еднаков пристап во известувањето за активностите од кампањите на кандидатите за претседател Гордана Силјановска Давкова и Стево Пендаровски индивидуално и со претставници на партиите кои ги поддржаа нивните кандидатури. Во известувањето за предвремените локални избори кое беше кусо се настојуваше да се почитува принципот на еднаквост.
Тоа го наведува Агенцијата за аудио и аудиовизуелни медиумски услуги (АВМУ) во извештајот за изборното медиумско претставување на радиодифузерите од 22 април до 3 мај.
Според АВМУ, известувањето кај националните медиуми било концентрирано на изборите за претседател, а за локалните избори имало еден до два прилога. Фокусот на обично помалубројните информации кај регионалните и локалните телевизии останал на локалните избори.
АВМУ оценува дека тонот при известувањето за активностите во изборните кампањи и кандидатите за претседател и за градоначалници бил генерално неутрален.
Известување за изборниот процес за лицата со оштетен слух на знаковен/толковен јазик обезбедија јавниот сервис МРТ1, ТВ 24 вести и регионалната ТВМ со седиште во Охрид. Извештајот за изборното медиумско претставување е достапен на www.avmu.mk.