Украинскиот претседател Володимир Зеленски за прв пат го коментираше гафот што му се случи на американскиот претседател Џо Бајден кога на крајот од самитот на НАТО го помеша украинскиот лидер со рускиот Владимир Путин.
„Тоа беше грешка. Соединетите Држави им дадоа голема поддршка на Украинците – можеме да заборавиме на некои грешки“, им рече претседателот Зеленски на новинарите по неговото денешно пристигнување во Ирска.
„Дами и господа, претседателе Путин“, рече Бајден во четвртокот додека го претставуваше Зеленски пред говорот на самитот на НАТО во Вашингтон.
Додека 81-годишниот демократ брзо се поправи, гафот поттикна нови шпекулации за тоа дали тој воопшто е способен за функцијата пред претседателските избори во САД во ноември. Десетици сојузници го повикаа Бајден да се повлече во корист на помлад кандидат.
Неговиот ривал, републиканскиот противкандидат Доналд Трамп, не губеше време за да се исмее со гафот на Бајден.
На средбата со ирскиот премиер Сајмон Харис по слетувањето во округот Клер, Зеленски ѝ се заблагодари на Ирска „за домаќинството на многу украински бегалци.
„Бевте со нас од самиот почеток на руската инвазија“, рече тој.
Како што пренесува Гардијан, украинскиот лидер следната недела ќе отпатува за Велика Британија за да им се придружи на своите колеги на состанокот на Европската политичка заедница во четврток.