Украинскиот претседател Володимир Зеленски реагираше на социјалните мрежи на ветувањето на рускиот лидер Владимир Путин да одговори на неодамнешниот напад на Киев врз руските воени аеродроми.
„Путин рече, многу цврсто, дека ќе мора да одговори на неодамнешниот напад врз аеродромите“, напиша американскиот претседател Доналд Трамп во објава на социјалните мрежи по телефонскиот разговор со Путин вчера.
Трамп делумно се осврна на нападот со беспилотни летала врз руските воени аеродроми во неделата, наречен „Операција Пајажина“, за кој се проценува дека уништил авиони и опрема во вредност помеѓу 4 и 6 милијарди евра. Белата куќа наводно не била информирана однапред за нападот од Украина.
„Многумина разговарале со Русија на различни нивоа. Сепак, ниту еден од овие разговори не донел сигурен мир ниту ја запрел војната“, одговори Зеленски во својата објава.
– За жал, Путин се чувствува неказнето. Дури и по сите ужасни руски напади, тој наводно подготвува повеќе таканаречени „одговори“. Ова значи дека со секој нов удар, со секое одложување на дипломатијата, Русија покажува среден прст кон целиот свет – кон сите оние кои сè уште се двоумат да го зголемат притисокот врз неа, истакна украинскиот претседател.
Зеленски изјави дека од почетокот на 2025 година, руската армија извршила напади врз Украина користејќи речиси 27.700 воздушни бомби, речиси 11.200 Шахед дронови, речиси 9.000 други ударни дронови и повеќе од 700 ракети, вклучувајќи ги и балистичките.
„Ова е темпото на руските напади, а тие намерно го поставиле уште од првите денови на целосна војна. Русија ја реструктуираше целата своја држава, општество и економија за да може масовно и неказнето да убива луѓе во други земји“, напиша Зеленски.
Украинскиот претседател нагласи дека ако светот реагира лошо на заканите на Путин, тој го толкува тоа како подготвеност да се затворат очите пред неговите постапки. Кога не чувствува сила и притисок, туку чувствува слабост, тој секогаш извршува нови злосторства. Тој го гледа таквиот став како тивка дозвола: дозвола за нови злосторства, нови напади, нови убиства.
„Затоа ние во Украина сме благодарни на сите во светот кои се обидуваат да ја запрат оваа војна и руските напади. На сите кои велат дека убиецот ќе биде повикан на одговорност. На сите кои велат дека руските ракети и бомби мора да престанат да одземаат невини животи“, нагласи Володимир Зеленски.
„Дури и денес, на Денот на сеќавање на украинските деца убиени од руската агресија, ги потсетуваме моќните од овој свет на фактите. Ако моќните не го запрат Путин, тоа значи дека ја делат одговорноста со него. И ако сакаат да го запрат, но не можат, тогаш Путин повеќе нема да ги смета за моќни“, заклучи Зеленски.