Речиси една петтина од обработливите површини во Кина се загадени, се наведува во денеска објавен извештај на Влада во Пекинг, изработен врз основа на анализи на почвата на целата кинеска територија.
Анализите, спроведени во периодот меѓу 2005 и 2013 година, покажуваат дека 16,1 отсто од почвата и 19,4 проценти од обработливите површини во Кина се загадени.
Во соопштението на кинеското Министерство за заштита на животната средина, земјата и природните ресурси, се наведува дека во 80 проценти од загадените површини е утврдено присуство на кадмиум, никел и арсен.
Кинеските медиуми оценуваат дека ваквите податоци го покренуваат и прашањето околу безбедноста на храната што се произведува во третата по големина економија во светот.