Новинарот на катарската телевизија „Ал Џезира“ Мохамед Хорани е убиен вчера во сириската провинција Дара, со што бројот на загинатите новинари во конфликтот во оваа земја достигна 20 лица.
– Мухамед Хорани е убиен од снајперски истрел на режимските сили во градот Баср ал Харир во провинцијата Дара додека известувал за судирите, соопшти „Ал Џезира“.
Пред ангажманот во „Ал Џезира“, 33-годишниот Хорани бил активен во бунтот против сирискиот претседател Башар ал Асад.
Портпарол на катарската телевизија истакна дека „нападот врз новинар соработник и екипата на Ал Џезира нема да го смени уредувачкиот начин на работа и правилата кои оваа мрежа ги усвоила уште од првиот ден на работа, пред 16 години, и со кои се обезбедува вистинско известување“.
Хорани е вториот убиен новинар во изминатите 24 часа во Сирија, откако францускиот новинар Ив Дебе беше застрелан во градот Алепо.