Циклонот „Фаилин“ мина низ источна Индија и денеска ослабна, откако, според последните информации, однесе 17 човечки животи, предизвика евакуација на речиси еден милион лица и причини голема материјална штета.
„Фаилин“ е најголемата бура која ја погодила Индија во последните 14 години, при што ударите на ветерот достигнуваа и до 200 километри на час.
Досега се потврдени 17 смртни случаи, а локалните власти оценуваат дека нема да има значително зголемување на смртните случаи поради масовната евакуација на речиси еден милион лица од крајбрежните подрачја.
Циклонот предизвика голема материјална штета, со оглед на тоа дека поројните дождови и поплавите уништија повеќе од 500.000 хектари посеви, вредни 395 милиони долари.
Во најтешко погодената држава Одиша, во прекин е електричното снабдување и комуникации, а патиштата се непроодни поради паднатите дрвја, додека десетина илјади куќи се уништени.