Едно лице загина, а 21 беа повредени во напад во Мисури на крајот од победничката парада на Канзас Сити Чифс, кои го освоија овогодинешниот Супербол. Осум лица се здобиле со повреди опасни по живот, а седум се тешко повредени, а нивните повреди може да бидат и опасни по живот, соопштија властите.
Меѓу ранетите има и девет деца, но се очекува сите да закрепнат. Полицијата соопшти дека уапсила тројца осомничени во врска со пукањето.
Истрелите биле испукани западно од станицата Унион, железничката станица во центарот на Канзас Сити, каде што завршила парадата околу 14 часот по локално време. На лице место имаше илјадници луѓе.
Локалните извештаи велат дека играчите на Канзас Сити Чифс сè уште биле на сцената кога одекнале првите истрели.
Шефот на полицијата во Канзас Сити Стејси Грејвс рече дека полицајците веднаш реагирале и брзо отвориле истрага. Пожарникарите влегле во акција и им пружиле помош на повредените.
Повеќе од 800 полицајци веќе беа на местото на настанот за да ја следат парадата, соопштија официјални лица. На прес-конференцијата одржана по нападот, началникот на полицијата Грејвс изјави дека биле застрелани вкупно 22 лица, од кои еден е мртов, а три лица се уапсени.
Локална радио станица објави дека една од нивните диџеи, Лиза Лопез, била убиена во пукање. Лопез беше мајка на две деца. Преживеаните жртви се пренесени во три локални болници, рекоа официјални лица, а оние кои беа застрелани и во непосредна опасност беа пренесени во болница во рок од 10 минути по пукањето.
Локалните болници соопштија дека ги лекуваат и луѓето кои не биле застрелани, но претрпеле други повреди во стампедото што следело по пукањето. Градските власти не ги објавија имињата на ниту една жртва. Тие исто така не споделија никакви информации за уапсените осомничени, вклучително и потенцијален мотив.
Американската ТВ куќа KTLA објави видео на кое се гледа како во стампедото кое настана по пукањето, неколку навивачи се фрлиле на еден од осомничените напаѓачи и го совладале додека не дојде полицијата.
Полициски извор изјави за CBS News дека пукањето изгледало како резултат на расправија која станала насилна. Изворот рече дека не станува збор за тероризам. Полицијата соопшти дека го истражува мотивот и собира физички, но и дигитални докази. Тие побараа од сите сведоци или поединци со информации да контактираат со полицијата.
Пукањето изби кога градот ја прославуваше втората последова победа на Канзас Сити Чифс во Суперболот, најважниот натпревар во американскиот фудбал.
Градоначалникот посочи дека градот има безбедносни мерки и треба да се охрабри јавноста длабоко да размислува за иднината. И покрај стотиците присутни полицајци, рече тој, овој инцидент сепак се случил поради присуство на лица со лоши намери кои имале оружје.
Американскиот претседател Џо Бајден во својата изјава се осврна на проблемот со вооруженото насилство во земјата. „Денешните настани треба да нè поттикнат, шокираат, срамат и да не поттикнат на акција“, рече тој, повикувајќи на реформа на законот за оружје со цел да се забрани јуришното оружје во САД.