Телата на двајца мажи кои отишле да помогнат во спасувачките операции беа пронајдени денеска, откако силна пролетна бура погоди делови од северна Италија и донесе повеќе од еден метар снег на делови од Алпите. Невремето ги затвори скијачките центри, го запре сообраќајот и однесе уште најмалку еден живот. Зафатени беа области во Франција, Италија и Швајцарија. Патиштата беа затворени, железничкиот сообраќај е во прекин, а делови од регионот останаа без електрична енергија, пренесува France24.
Иако снегот во април не е невообичаен за Алпите, количината која падна за само неколку часа ги изненади и властите и локалното население. Во Италија, телата на 64-годишен маж и неговиот 33-годишен син беа пронајдени во близина на Виченца, во регионот Венето, со што бројот на загинати во земјата се искачи на три.
Таткото и синот доброволно се пријавиле да помогнат во спасувачките операции откако обилните дождови го погодија северот на земјата. Тие биле на пат кога нивното возило било однесено од поплава. Регионалниот водач Лука Заја го опиша настанот како незамислива трагедија.
Еден ден претходно, 92-годишен маж беше пронајден мртов во неговиот поплавен дом во северниот регион Пиемонт, соопштија пожарникарите. Во официјалниот извештај се наведува дека интензивен и обилен дожд го зафатил северот на Италија, и се претворил во снег над 1800 метри надморска височина.
Во францускиот ски-центар Вал Торенс, една жена доживеа срцев удар откако беше затрупана од лавина, соопштија властите. Во Тињ, властите им наредија на жителите да останат внатре, откако во текот на ноќта паднаа повеќе од 1,1 метар снег.
„Сите автомобили се закопани до покривот… Самото одење надвор е загрижувачко“, рече Матис, вработен во хотел во Тињес. Предупредувањата за лавини се подигнати на највисоко ниво во неколку региони, а некои скијачки центри се затворени. Во швајцарскиот град Сион, кој има 36.000 жители, властите исто така им наредија на луѓето да останат дома.
На тешки камиони им беше забрането да минуваат низ тунелот Мон Блан кој ги поврзува Франција и Италија, а десетици возила кои не можеа да поминат низ тунелите беа заглавени на автопатот А43 меѓу двете земји. Проблеми имало и со возовите, а во еден момент без струја останале повеќе од 3.300 домаќинства во Франција и 5.000 во Италија, соопштија властите.