Еден британски ветеран, кој не добил дозвола од Домот за стари лица, во кој претстојува да присуствува на церемонијата по повод одбележување на „Денот Д“ во Франција, побегнал од домот и по 12 часа пристигнал во Нормандија, пренесе „Дејли телеграф“.
Осумдесет и деветгодишниот пензионер, чиј што идентитет не е откриен, одлучил да ја игнорира забраната на вработените во домот и по секоја цена да пристуствува на свеченоста. Тој во четврток наутро, со своите ордени, сокриени под капутот, влегол во автобусот во кој биле ветераните кои требало да отпатуваат во Нормандија.
Неговото исчезнување, вработените во Домот за стари лица во градот Хоув, Велика Британија, го забележале дури во доцните попладневни часови. Полицијата ја пребарала областа, ги проверила болниците, автобуските компании и такси службите, но не го пронашле.
Вечерта во домот им било јавено дека старецот е жив и здрав и дека со своите пријатели е во Нормандија.
-Еден ветеран се јави во домот и потврди дека „бегалецот“ е добро и дека ќе се врати откако церемониите ќе завршат-изјави портпаролот на полицијата.
Е. Г.