Претставници на украинските сепаратисти тврдат дека мировните преговори предвидени за денеска во Минск се одложени и го обвинија Киев дека бега од дијалог.
Пред да ја напушти белоруската престолнина, преговарачот на самопрогласената Доњецка република Денис Пушилин изјави дека доколку бидат обновени судирите со украинските сили, бунтовниците се подготвени да ја продолжат офанзивата и да ја преземат контролата над Доњецката и Луганската област.
– Киев не е подготвен да преговара затоа што не е во состојба да ги контролира своите единици и да ги натера да престанат да стрелаат кон станбени квартови, рече Пушилин, цитиран од ДПА.
Во Киев, заменик министерката за надворешни работи Елена Зеркел изјави дека засега има само првичен договор дека денеска или утре во Минск ќе се одржи средба на Контакт групата за Украина.
Руски медиуми пишуваат дека средбата најверојатно ќе се одржи утре.