Американскиот претседател Доналд Трамп денеска ја опиша мисијата на директорот на ЦИА, Џон Ретклиф, во Москва како „помалку или повеќе рутинска“, отфрлајќи ги наводите дека ненадејната посета била поврзана со можни руски воени закани кон НАТО или Велика Британија.
„Ништо од наведеното“, одговори Трамп во интервју за конзервативниот радио-водител Глен Бек, на прашањето дали Ретклиф отпатувал во Москва поради стравувања дека Русија ја тестира решителноста на сојузниците или подготвува напад врз Велика Британија.
Трамп го опиша директорот на ЦИА како „фантастичен човек“ и нагласи дека неговото патување во руската престолнина не било поврзано со такви причини.
„Сега, можеби нешто и ќе произлезе од тоа. Многу напорно работиме на тоа да заврши војната во Украина“, изјави американскиот претседател.
Посетата на Ретклиф во Москва се случи во вторникот и не беше претходно најавена. Директорот на ЦИА пристигна во руската престолнина во ненадејна мисија, по што беше потврдено дека имал контакти со претставници на руските безбедносни служби.
Кремљ потврди дека посетата вклучувала контакти меѓу американските и руските безбедносни структури, но соопшти дека Ретклиф не се сретнал директно со рускиот претседател Владимир Путин.
Портпаролот на Кремљ, Дмитриј Песков, изјави дека Путин бил информиран за разговорите, но не откри детали за нивната содржина. Не е соопштено ниту што конкретно било разгледувано за време на средбите.
Ретклиф веќе извесно време одржува комуникација со Сергеј Наришкин, директорот на руската надворешна разузнавачка служба (СВР), што претставува еден од ретките директни канали за комуникација меѓу Вашингтон и Москва во период на сериозно затегнати односи.
Посетата привлече дополнително внимание поради необичниот настан што следеше во американската амбасада во Москва. По заминувањето на Ретклиф, на снимки објавени на социјалните мрежи се забележува дека американските знамиња биле симнати од зградата на амбасадата.
За овој потег досега нема официјално објаснување од американската амбасада или од Стејт департментот. Нема потврда ниту дека станува збор за политичка порака, вонредна ситуација или промена на дипломатскиот статус на амбасадата.
Токму комбинацијата од ненадејната посета, разговорите зад затворени врати, фактот дека Ретклиф не се сретнал со Путин и симнувањето на американските знамиња предизвика бројни шпекулации.