Американскиот претседател Доналд Трамп ги потпиша плановите ЦИА да спроведува тајни операции во Венецуела. Во исто време, Трамп ги продолжи задкулисните разговори со владата на претседателот Николас Мадуро, објави „Њујорк тајмс“.
Според „Њујорк тајмс“, Трамп одобрил дополнителни мерки за притисок, вклучувајќи го и најголемиот американски носач на авиони кој моментално е распореден во Карибите, како подготовка за потенцијално поширока воена кампања.
Тајните операции би можеле да вклучуваат саботажа или сајбер, психолошки и информативни активности, но не е јасно кои мерки ќе бидат употребени или кога.
„Трамп потпиша договор со ЦИА за тајни операции во Венецуела, операции кои би можеле да бидат дизајнирани да го подготват бојното поле за понатамошни дејствија“, велат изворите.
Трамп не одобрил испраќање борбени сили во Венецуела, а воените и разузнавачките планери подготвиле голем број опции, вклучувајќи листи на потенцијални цели поврзани со производство на дрога и можни напади врз воени единици лојални на Мадуро.
Американскиот претседател минатата недела одржа два состанока за Венецуела.
Белата куќа и ЦИА одбија да коментираат за обвинувањата.