Во јужен Дамаск се водат тешки борби меѓу сириската армија и бунтовниците, а реонот е под артилериска стрелба на силите на режимот, соопшти Сирискиот центар за набљудување на правата на човекот, цитиран од француските медиуми.
-Тешки борби се водат меѓу востаничките борци и редовната армија кај автопатот Дамаск-Дераа, во јужниот кварт Кадам, и во југозападното предградие Дараја, соопшти невладината организација.
Сириската армија испраќа засилувања во Дараја во обид да си ја поврати контролата над реонот, што веќе неколку недели е во раце на бунтовниците.
Армијата го гранатирала Асали, во јужниот дел на престолнината, каде се водат борби во близина на палестинскиот бегалски камп Јармук и во соседниот кварт Тадамун.
Во источните делови на квартовите на Дамаск тројца бунтовници се убиени во борбите во Ербин и Хараста, кои, исто така се гранатирани од артилеријата на режимот.
Во северниот град Хомс, на гранатирање е подложен квартот Халдие, што веќе шест месеци е под опсада од армијата.
Во борбите се убиени шестмина бунтовници. Во текот на ноќта, исто така, се гранатирани провинциите Хама, Дераа и Деир аз Зур.