Светската здравствена организација (СЗО) прогласи крај на пандемијата на коронавирус.
СЗО прогласи крај на вонредната состојба со Ковид-19, наведувајќи дека болеста што ја предизвика пандемијата станува рутинска болест.
Ковид-19 ќе остане, но тој повеќе не предизвикува бранови хоспитализации и болести како некогаш, бидејќи луѓето ширум светот изградија имунитет на вирусот, соопшти СЗО.
Светската здравствена организација вели дека стапката на смртност од вирусот паднала од врвот од повеќе од 100.000 луѓе неделно во јануари 2021 година на нешто повеќе од 3.500 на 24 април оваа година. Шефот на СЗО, Тедрос Аданом Гебрејесус, рече дека најмалку седум милиони луѓе починале во пандемијата, но додаде дека вистинската бројка е „веројатно поблиску до 20 милиони“ и дека „останува значајна закана“.
„Вчера, Комитетот за итни случаи се состана по 15-ти пат и ми препорача да прогласам крај на вонредната состојба за јавно здравје од меѓународен интерес. Го прифатив тој совет“, рече Гебрејесус, додавајќи дека „Ковид-19“ заврши како глобална здравствена криза.