Светски самит посветен на завршување на епидемијата со Ковид-19 и подготовки за идните здравствени закани ќе се одржи на 12 мај, соопшти Белата куќа.
Со виртуелниот состанок ќе претседаваат САД, Германија, која во моментов претседава со Г-7, Индонезија која претседава со Г-20, Сенегал, Африканска Унија и Белизе, која претседава со Асоцијацијата на држави на Кариби (ЦАРИЦОМ).
– Самитот ќе ги удвои нашите колективни напори за ставање крај на акутната фаза на епидемијата на коронавирусот и ќе нè подготви за идни здравствени закани. Пред самитот на 12 мај, ги повикуваме светските лидери, членовите на граѓанското општество, невладините организации и приватниот сектор да преземат нови одговорности и да донесат решенија за вакцинирање на светското население, спасување животи и градење подобра здравствена безбедност низ целиот свет, се наведува во заедничката изјава на Белата куќа со копретседавачите.
Тоа ќе биде втор светски самит посветен на пандемијата со Ковид-19, кој уби повеќе од шест милиони луѓе ширум светот и ја наруши глобалната економија од нејзиното појавување во декември 2019 година.
Американскиот претседател Џо Бајден одржа сличен самит на 22 септември 2021 година, при што апелираше на посилна кампања за вакцинација низ целиот свет.
Извор: МИА