Светската популација забрзано старее, а поголем дел од земјите не се подготвени да се справат со се поголемиот број стари луѓе, покажува најновата студија на Фондот за население на ОН (УНФПА).
Во студијата која УНФПА ја изработи заедно со група за заштита на правата на старите лица „Хелп ејџ интернешенел“ (HelpAge International), оценуван е социјалниот и економски статус на старите лица во 91 земја.
Утврдено е дека старите лица најдобро живеат во Шведска, а најлошо во Авганистан.
Се укажува дека државите не работат доволно брзо за да се соочат со се побрзото стареење на популацијата.
До 2050 година луѓето постари од 60 години ќе го надминат бројот на помлади од 15 години, и тоа првпат во историјата.
Во студијата се анализирани приходите, здравјето, образованието, вработеноста и опкружувањето на луѓето на различна возраст во секоја земја.