Велика Британија во 2020 година забележала најголем економски пад во последните 300 години, последица на пандемијата на Ковид-19.
Ажурираните официјални податоци објавени денеска покажуваат дека бруто домашниот производ на Британија во 2020 година опаднал за 11 отсто, што е најголем економски пад од 1709 година, според историските податоци што ги чува Банката на Англија.
Канцеларијата за национална статистика ја ревидираше претходно дадената проценка за пад на економијата од 9,3 проценти. Последната ревизија го прави британскиот економски пад во 2020 година најголем меѓу државите од групата „Г-7“ најразвиени земји, пред Шпанија каде тој изнесува 10,8 отсто.
Британската економија успеа да закрепне во 2021 година, но брзиот раст на инфлацијата и последичното заострување на монетарната политика се закануваат дека економијата повторно ќе влезе во рецесија на крајот на годината.
Извор: МИА