Генералниот секретар на НАТО, Јенс Столтенберг го осуди денеска терористичкиот напад во Манчестер, истакнувајќи дека очекува Алијансата посилно да се вклучи во борбата против тероризмот.
– На утрешната средба ќе покажаме дека сите сојузници остануваме обединети во борбата против тероризмот во сите негови облици, изјави Столтенберг на прес-конференција пред почетокот на самитот на НАТО.
Тој очекува сите сојузници да дејствуваат повеќе во борбата против тероризмот по „бруталниот напад во Манчестер“.
Во Брисел утре се одржува самит на НАТО на кој се очекува американскиот претседател Доналд Трамп да побара и Алијансата да се вклучи во меѓународната коалиција против Исламска држава.
Столтенберг нагласи дека влезот на НАТО во таа коалиција нема да значи дека во неа би имал „борбена улога“.
Како што е претходно најавено, на утрешниот самит ќе биде отворено ново седиште на НАТО, иако се уште не е целосно довршено.