Индиските експерти денеска соопштија дека создале евтина вакцина против опасниот ротавирус, кој предизвикува смртоносна дијареја, од која во Индија годишно умираат 100.000 деца.
Вирусот предизвикува дехидрација и тешка дијареја поради што умираат 453.000 деца годишно, а најголема закана пртставува за африканските и азиските деца, на кои не им е достапна итната медицинска помош.
К. Виџарагаван од индиското Одделение за биотехнологија, еден од учесниците во создавањето на новата вакцина, под име „ротавак“, истакна дека таа е производот на меѓународна соработка и дека треба да биде одобрена од индиските здравствени власти.
– Вакцината е подготвена за производство, се применува орално, а ќе чини еден долар по доза. За имунизација против дијарејата потребнио се три дози, истакна Виџарагаван.
„Ротавак“ ќе ја произведува компанијата „Барат бајотек фармасјутикалз“ од Хајдербад.
Ротавирусот е одговорен за 884.000 случаи на хоспитализација во Индија годишно, што земјата ја чини 3,4 милијарди рупии (72 милиони долари).