По терористичкиот напад во Париз мерките на безбедност се зголемени на повеќе места во Европа, вклучувајќи ги и скандинавските земји.
Во моментот секој трети Швеѓанец, околу 36 отсто од испитаниците, сметаат дека Шведска ризикува да биде погодена од терористички атентати, јави дописникот на МИА од Гетеборг.
Според резултатите од испитувањето на јавното мислење што го подготви институтот „Сифо“, гледано од партиско-политички аспект, најголема вознемирност, 67 проценти, чувствуваат членовите и симпатизерите на екстремно-десничарската партија Шведски демократи.
Меѓу симпатизерите на опозицискиот десничарски параламентарен блок 42 проценти чувствуваат вознемиреност од ризиците поврзани со терористички напади, а меѓу симпатизерите кои ја поддржуваат владејачката социјалдемократска влада во коалиција со зелените бројката изнесува 30 проценти.
Испитувањето исто така покажува дека постариот дел од шведската популција верува во поголем обем дека нивната земја ризикува напад од терористи.