Американскиот претседател Џо Бајден и генералниот секретар на НАТО Јенс Столтенберг ја потврдија желбата Шведска да се приклучи на НАТО. За време на средбата во Вашингтон, двајцата лидери „ја истакнаа заедничката желба што поскоро да и посакаат добредојде на Шведска во Алијансата“, се вели во соопштението на Белата куќа.
Шведска ја сигнализираше својата намера да се приклучи на НАТО минатиот мај, но нејзиниот пристап е блокиран од Турција и Унгарија. Во извештајот на Белата куќа се наведува дека Бајден и Столтенберг разговарале и за „импликациите од руската војна против Украина за трансатлантската безбедност и одбраната на НАТО“.
„Тие ја поздравија поддршката што сојузниците и партнерите ја даваат билатерално за да и помогнат на Украина да се одбрани од руската агресија“, се додава во соопштението. Претходно, Столтенберг рече дека неодамнешните достигнувања на Украина на бојното поле ја нагласуваат потребата од континуирана помош од Западот за да му се даде на Киев „посилна рака“ во какви било идни преговори со Москва.