Туниската полиција денеска фрли солзавец врз демонстрантите, кои трет ден по ред демонстрираат во градот Силијана, а во изминатите 24 часа беа повредени 265 лица.
Стотици лица демонстрираа и денеска барајќи локалниот гувернер Ахмад Езин Махџуби да си поднесе оставка, пренесуваат француските медиуми.
Демонстрантите запалија полициски пункт и две возила, а протестите почнаа да се шират и кон централниот дел на земјата.
Вчера, најмалку 265 лица, од кои 19 потешко, беа повредени во судирите меѓу силите за безбедност и демонстрантите кои ја бараат оставката на гувернерот.
Болнички извори наведуваат дека во Силијана се хоспотализирани 206 лица, од кои 19 ималет прострелни рани и повреди на главите, па затоа биле префрлени на лекување во главниот град Тунис.
Силијана е сиромашен рурален регион одалечен од главниот град околу 120 километри.
Демонстрантите покрај оставката на гувернерот, истовремено, бараат и ослободување на 14 лица притворени во текот на протестите од април 2011 година, како и парични средства за потткнување на економнскиот раст во овој сиромашен регион.