Саудиска Арабија денеска соопшти дека нема да воспостави дипломатски односи со Израел без формирање на палестинска држава, порака што дојде откако американскиот претседател Доналд Трамп изјави дека Ријад не бара палестинска држава.
Во соопштението на саудиското Министерство за надворешни работи се вели дека саудискиот престолонаследник Мохамед бин Салман ја потврдил позицијата на земјата на „јасен и експлицитен начин“ кој не дозволува никакво толкување под никакви околности, пренесе Ројтерс.
Саудиска Арабија, исто така, отфрла какви било обиди за раселување на Палестинците од нивната земја, се вели во соопштението и се додава дека позицијата на Ријад кон Палестинците не е предмет на преговори.
Трамп претходно изјави дека САД ќе го „преземат“ Појасот Газа, опишувајќи ја неговата визија за областа како нова „ривиера на Блискиот Исток“.
Американскиот претседател, исто така, рече дека разговарал со други лидери на Блискиот Исток за неговиот предлог Палестинците да се преселат од Газа и рече дека на другите регионални лидери им се допаѓа идејата, која Палестинците претходно ја отфрлија.