Американскиот претседател Доналд Трамп денес се закани дека целосно ќе ја уништи иранската енергетска инфраструктура, островот Харг и постројките за десалинизација доколку „новото“ иранско раководство и САД не постигнат договор за повторно отворање на Ормутскиот теснец.
„САД се во сериозни преговори со новиот, поразумен режим во Иран за прекин на нашите воени операции. Постигнат е голем напредок, но доколку поради која било причина не се постигне договор наскоро, што веројатно ќе биде, и доколку Ормутскиот теснец не биде веднаш отворен за работа, ќе го завршиме нашиот „убав престој“ во Иран со дигање во воздух и целосно уништување на сите нивни електрани, нафтени бунари и островот Харг, а можеби и сите нивни постројки за десалинизација, кои намерно сè уште не сме ги допреле“, напиша Трамп на својата социјална мрежа Truth social.
Според него, ова ќе биде одмазда за американските војници кои загинаа за време на 47-те години „владеење на теророт“ на стариот ирански режим.