САД соопштија дека резултатите според кои актуелниот претседател на Зимбабве Роберт Мугабе победил на изборите „не се уверливи“, додавајќи дека целиот изборен процес бил неправилен.
– САД не веруваат дека овие резултати ја претставуваат вистинската волја на народот на Зимбабве, се наведува во изјавата на американскиот државен секретар Џон Кери.
Според податоците на изборната комисија на Зимбабве, 89-годишниот Мугабе победил на изборите со 61 отсто од гласовите, наспроти 34 проценти за неговиот противкандидат, премиерот Морган Цвангираи, кој ги оцени резултатите како „фарса и неважечки“ и најави дека ќе ги оспори на суд.
ЕУ, исто така, вчера изрази загриженост во врска со наводните неправилности и недостигт на транспарентност на изборите во Зимбабве, што досега претставува најостра критика на Унијата кога станува збор за избори во оваа африканска земја.