Руското Министерство за одбрана денеска соопшти дека извршило масовен напад во текот врз украинскиот воено-индустриски комплекс користејќи воздушно, копнено и поморско оружје и беспилотни летала со долг дострел.
Во соопштението се наведува дека се погодени фабриките во украинската воздухопловна, ракетна и вселенска индустрија, машинско и производство на оклопни возила, како и капацитети за производство на ракетно гориво и барут, пренесува Ројтерс.
Украинските власти соопштија дека Русија истрелала проектили и беспилотни летала кон Киев во текот на ноќта, при што загинале најмалку десет луѓе, а 90 се ранети, пренесе Укринформ.
„Од 16 часот и 45 минути, бројот на загинатите од рускиот напад врз главниот град се искачи на 10 лица, а 90 се повредени“, објави прес-службата на Државната служба за вонредни состојби на Украина на својот канал „Телеграм“.
Нападот ги погоди и регионите Харков, Дњепропетровск, Житомир, Запорожје и Хмелницки, пренесува Танјуг.