Израелскиот премиер Бенјамин Нетанјаху му се извини на Катар откако Израел ја бомбардираше Доха претходно овој месец во обид да убие претставници на Хамас, дознава Ројтерс.
Според извор близок до израелскиот лидер, Нетанјаху разговарал по телефон со премиерот Мохамед бин Абдулрахман Ал Тани, повикувајќи го од Белата куќа.
Инцидентот се случи кратко откако Нетанјаху пристигнал во Белата куќа, каде што го пречека американскиот претседател Доналд Трамп. Ројтерс дознава дека американскиот претседател разговарал и со Катар во понеделник.
Израел изврши напад врз Катар претходно овој месец, таргетирајќи претставници на Хамас. Терористичката група долго време го имаше своето политичко седиште во Доха. Во тоа време, Катар, сојузник на САД, го осуди нападот како „предавнички“ и „јасно кршење на сите меѓународни закони и норми“.
Американскиот претседател Доналд Трамп и израелскиот премиер Бенјамин Нетанјаху моментално се среќаваат во Белата куќа во Вашингтон на клучен состанок што би можел да влијае на текот на конфликтот во Газа.
Главната тема на разговорот е предлогот на Трамп од 21 точка, кој предвидува прекин на огнот, воспоставување повоена управа во Газа и ослободување на израелските заложници што ги држи Хамас.
Трамп изрази оптимизам за постигнување мир, додека Нетанјаху сè уште не дал конечно одобрение и планира да ги изнесе своите резерви. Средбата вклучува заеднички ручек и прес-конференција, а се одржува во време кога израелската армија продолжува со својата офанзива во Појасот Газа.
Израелскиот премиер е под притисок да го прифати планот на Трамп, кој вклучува обврска на Израел да не го анектира Западниот Брег и формирање нова палестинска влада без Хамас, додека многу детали сè уште се предмет на преговори.
Хамас ја нагласи својата подготвеност одговорно да го разгледа предлогот за прекин на огнот, но без да се откаже од националните права на палестинскиот народ.