Претседателот на Зимбабве Роберт Мугабе изјави дека е подготвен да се кандидира на следните претседателски избори во 2018 година.
Тоа го изјави за јапонскиот весник „Сенкеј шимбун“, во денеска објавеното интервју..
– Приврзаниците ја сакаат мојата кандидатура, нагласи 92-годишниот претседател на Зимбабве, кој се наоѓа во официјална посета на Токио
– Ако народот посака, ќе ги исполнувам задолженијата и понатаму, додаде Мугабе.
Претседателот ги отфрли обвиненијата од Западот, според кои тој ја потиснува опозицијата и ги нарече „навреди кон народот на Зимбабве“.
Роберт Мугабе е највозрасниот државен лидер во светот. Тој раководи со земјата од 1980 година, откако таа е независна.
За време на сегашната посета на Токио, јапонскиот премиер му вети на Зимбабве економска помош од речиси 5,4 милиони долари за изградба на патишта.