Владимир Путин собира искусни дипломати за да преговара со тимот на Доналд Трамп за можен договор за ставање крај на војната во Украина.
Рускиот лидер Владимир Путин составува тим од тешки преговарачи со децениско искуство во дипломатијата на високо ниво за да се вклучат во разговори со претставници на американскиот претседател, кој се обидува да постигне договор за ставање крај на руската војна во Украина.
Неименувани извори открија дека во преговарачкиот тим се Јуриј Ушаков, главниот советник за надворешна политика на Кремљ и Сергеј Наришкин, највисокиот разузнавач на Путин кој служел со него во КГБ, пишува Блумберг, а пренесува European Justice.
Кирил Дмитриев, финансиер образован на Стенфорд и Харвард, со врски со семејството на лидерот на Кремљ, би можел да игра клучна улога како неформален канал за комуникација со преговарачите на Трамп.
Позадината на Дмитриев во САД и неговото искуство во компании како што се McKinsey & Co. и Goldman Sachs Group Inc. сугерираат дека Путин е подготвен да го прилагоди својот пристап во справувањето со неконвенционалниот американски претседател.
Седумдесет и седумгодишниот Ушаков беше помошник на Путин повеќе од една деценија и беше руски амбасадор во САД од 1998 до 2008 година, стекнувајќи длабоко знаење за тоа како да преговара со Вашингтон.
Нарашкин (70) е долгогодишен доверлив помошник на рускиот лидер, кој работи со него повеќе од четири децении. На 13 февруари тој им рече на новинарите дека Кремљ веќе им наредил на руските разузнавачки служби да ја обноват соработката со нивните американски колеги по телефонскиот разговор на Трамп со Путин еден ден претходно.
И Ушаков и Нарашкин беа вклучени во преговорите за прекин на огнот со Украина веднаш откако Русија ја започна својата целосна инвазија во 2022 година.
Дмитриев неодамна беше вклучен во преговорите за ослободување на американскиот учител Марк Фогел од руски затвор.