Украинскиот претседател Петро Порошенко изјави денеска на седница на националниот Совет за безбедност и одбрана дека Украина останува на договорот од Минск.
– Нема да дозволиме уривање на договорот од Минск. Се треба да се базира исклучително на него, истакна Порошенко, додавајќи дека е потребно да се обезбеди негово спроведување, и во рамките на Контакт групата.
Порошенко изјави дека за Киев приоритет е почитување на режимот на прекин на огнот, ослободување на заробениците, повлекување на странската војска, затворање на границите и почеток на политички процес за решавање на ситуацијата, што е во согласност со договорот од Минск.
Украинскиот претседател нагласи дека според договорот од Минска аеродромот во Доњецк треба да биде демилитаризирана зона.
Учесниците на седницата на националниот Совет за безбедност и одбрана со едноминутно молчење оддадоа почит на жртвите во Мариупољ, каде вчера загинаа 30 лица, а 95 беа повредени.
Порошенко, исто така, нагласи дека министрите за надворешни работи на ЕУ и Украина ќе се сретнат утре. – Утре треба да биде одржана седница на министрите за надворешни работи на ЕУ, на која ќе бидат координирани постапките за обезбедување на безбедност на Украина и зголемување на притисокот на Русија, изјави украинскиот претседател.